जीवन खसुइ

जीवन खसुइ डा. पुष्पराज राजकर्णिकारया च्वसां पिदंगु खुगूगु सफू खः । कुतः पिकाकः ख्वप पाखें ने.सं. ११४१ य् पिदंगु थ्व सफू च्वमिया धात्थेंगु जीवन परिचय, जीवनय् जूगु घटनाया विवरण, च्वमिया समाजया परिचय आदि दुथ्याकाः च्वयातःगु आत्मवृतान्तया सफू खः । थ्व सफुलिइ आत्मकथा लेखनय् छ्यलिइगु थीथी शैली मध्येय् विवरणात्मक शैली छ्यलाः सरल भासं व्यवस्थित रुपं च्वमियात अःपुक म्हसिइके फइकथं च्वयातःगु दु । थ्व जीवन खसुइ सफू थः हितचित्तम्ह पासा कवि भगतदासजुं कर हे यानाः च्वकादीगु व थःगु जीवनया अनुभव मेपिं ब्वमिपिंत ज्या वयेफु धयागु खँ मनन यासें कोरोनां सकसितं सातु कयाच्वंगु लकडाउनया ईयात सदुपयोग यानाः सृजना जूगु खँ च्वमिं थ्व सफूया भूमिकाय् न्ह्यथनादीगु दु । मुक्कं झिंनिब्वय् ब्वथलातःगु थुगु आत्मवृतान्त सफुलिइ थःगु पारिवारिक जीवन, शिक्षा, लजगाः, सामाजिक जीवन, राजनैतिक जीवन, धर्म, साहित्य, भाषिक आन्दोलन आदि बारे जक मखु थःगु धारणा भावना अनुभूति नं ब्वयादीगु दु । गथे — साहित्य जनपक्षीय जुइमाः, आत्मसन्तुष्टी कायेत जक च्वयेगुमखु,थःगु भासं जक च्वयाः कट्टरता क्यनाः मेमेगु भाषाया साहित्य व साहित्यकारपिं नाप ब्यागलं च्वनेगु आत्मकेन्द्रित प्रवृति त्वःताः मेमेगु भाय्‌यापिं नाप स्वापू क्वातुका यंकेमाः, भाय् हिलाः छगू भासं मेगु भाय् या लागाय् चक्कंका यंकेमाः, झीगु अस्तित्व ल्यंकेत, झीगु सः थ्वयेकेत राजनीति याये हे माः, राजनीति मयानाः थौं नेवाःत सिंहदरवारं झन्झन् पिने लाःवन आदि आदि । अथेहे थःगु जातीय पहिचानया न्ह्यःने गभर्नर ला छु व स्वयाः तःधंगु पद नं छुं मखु, भाषा जाति व राजनीति निगः नांचाय् पलाः न्ह्याके मफइगु जुयाः जिं एमालेया नांचा त्वःता छ्वया धकाः थःगु व्यक्तिगत जीवनया खँ व राजनीतिया बांमलाःगु कूटनीतिं नुगलय् झ्वयेपिउगु दुघाः नं प्वंकादीगु दु । थुकथं थ्व जीवनया खुसुइ सफूया — विशेषता ध्यागु थः अतिकं स्याःन्याःम्ह पासायात थःगु दुविस्ताया फुक्कं खँ कनाच्वंगु थें अनुभूति बिइफुगु खः।