जिमिगु भुतू ख्वाउँसे ख्वाउँसे तिनि नेपालभाषाया नांजाःम्ह च्वमि भाजु नर्मदेश्वर प्रधानं च्वयादीगु आधुनिक कविता संग्रह खः । सान्त्वना प्रकाशन येँ पाखें ने.सं. ११२८ य् पिदंगु थ्व सफुलिइ स्वीन्हय्पु कविताया नापं थुकी दुथ्याःगु कविताया बारे पद्मरत्न तुलाधरया तःहाकःगु समिक्षात्मक च्वसु दुथ्याःगु दु । कवि नर्मदेश्वर प्रधानं थ्व संग्रहयात गद्य चिनाखँ मुना धयादीसां थ्व गद्य चिनाखँ मुना जक मखु आधुनिक कविता मुना नं खः । अभिव्यक्तिया तीक्ष्णता तिब्रता, राष्ट्रप्रेमया भावना, देसय् विद्यमान विसंगति विकृतिया यर्थाथ चित्रण, थःगु हे ब्स्किं व्यंग्य, विम्व, प्रतिकया प्रयोग थ्व संग्रहया विशेषता खः ।
