सौरभ शाक्यया च्वसां पिज्वःगु जिन्दगी गजल संग्रह ने.सं. ११४२ पोहेलाथ्व द्वादशी कुन्हु कुतः पिकाकः ख्वपपाखें पिदंगु खः । थुगु संग्रहय् जिन्दगी विम्व छ्यलाः सछिपु गजल दुथ्याकातःगु दु । गजल दुने जिन्दगीया थीथी भोगाइया परिघटना न्ह्यब्वयातःगु दु । अथेहे देय्या करुणाचाइपुगु वर्तमान अवस्था, आशा–निराशाया भाव दु । थौंया समाजय् विद्यमान वर्गीय विभेद प्रति सचेतना दु । थज्याःगु विभेद न्हंकेत न्हापां जनता हे न्ह्यज्यायेमाःगु सन्देश दु ।
