थ्व सछिदँया नेपालभाषा बाखं ल्यया (छब्व, निब्व) सफू नेपालभाषाया महत्वपूर्णगु ग्रन्थ खः । थ्व ग्रन्थया सम्पादक भाजु भूषणप्रसाद श्रेष्ठ खः । वय्कःया अथक प्रयास अतुलनीय खः । थ्व सफू नागार्जुन पब्लिकेशन प्रालि पाखें ने.सं.११३५य् प्रकाशित जूगु खः । १४५७ पेजया जूगु हुनिं थ्व सफू निगू ब्वय् प्रकाशित जूगु दु । नेपालभाषा साहित्यय् बाखं कनेगु न्यनेगु परम्परा तसकं हे पुलां ।नेपालभाषाय् श्रीमद्भागवत ने.सं. ६२५, तन्त्राख्यान ने.सं.६३८, धर्मलक्ष्मी संवाद ने.स.६९१ य् च्वये धुंकूगु खः । अथे हे स्वस्थानि, पशुपति पुराण, विश्वन्तर, स्वयम्भू पुराण आदि नं झीथाय् न्हापां निसें दयावःगु खः । थुगु हे परम्पराय् छापा आखः वयेधुंकाः ध्वाना सफुलिइ छापय् जूगु स्वतन्त्र मौलिक चिन्तनं पिज्वःगु बाखं साहित्यया परम्परा ने.सं.१०३१ निसें सुरु जूगु कथं ललितविस्तरया दुनेया छपु बाखनं निसें ने.सं.११३० तकया नेपालभाषाया बाखं च्वमिपिनि प्रतिनिधिमूलक बाखं थ्व सफुलिइ दुथ्यानाच्वंगु दु । नेपालभाषाया बाखं साहित्यया सछिदँया विकासक्रमयागु थ्व छगू न्हाय्कं खः । थ्व सफुलिइ प्रत्येक झिदँ झिदँया बाखंयात ब्वथला कथहं बाखं दुथ्याकातःगु दु । गुकिं यानाः अध्ययन अनुसन्धान याइपिं विद्वानपिंत नेपालभाषाया बाखंया विकासक्रम सीकेत तसकं अःपुकाब्यूगु दु । नेपालभाषा साहित्यय् थ्व छगू महत्वपूर्ण ग्रन्थ खः ।