बद्री बेदनाया च्वसां पिज्वःगु संस्कृति लुमंकाः मनेजा काव्य सफू ने.सं. ११२५ कछलाथ्व पारुकुन्हु साहित्य एकेडेमि पाखें पिदंगु खः । थुकी मुक्कं ६७ पु म्येँ नं दुथ्यानाच्वंगु दु । मेनजाया पूर्ण रुपं मेला, नखःचखः व जात्रा खः । थुकियात चिहाकलं मेनजा धकाः नां छुनाः न्हू प्रयोग कथं सिर्जना जुयाच्वंगु खः । चिनाखँ प्वला वनेबलय् मुक्कं नेवाः सवाः दु । नेवाः पहः दु । नेवाः म्हसीका दु । नेपाःया संस्कृति धर्म नखःचखः मेला जात्राया चित्रण खनेदु । थुगु मेनजा सफुलिइ थःगु देय्या कला व संस्कृति ल्यंकातयेगु कुतः जुयाच्वंगु खनेदु ।