संवत् सन्दर्भ छगू दुवाला भाजु पूर्णराम मुनकर्मिं च्वयादीगु नेपाल संबत् सम्बन्धी अनुसन्धानमूलक सफू खः । नेपालभाषा एकेडेमिपाखें ने.सं. ११४१ चिल्लाथ्व फागुपुन्हि कुन्हु पिदंगु खः । भाजु मुनकर्मि नेपाःया संस्कृति, परम्परालिसें नेवाः सम्पदा विशेषया अध्ययन व अनुसन्धानय् सक्रिय जुयादीम्ह अनुसन्धाता खः । भाजु पूर्णराम मुनंकर्मिं थ्व सफुलिइ नेपाल संबत्या सम्बन्धय् झीगु देशय् प्राचीनकालंनिसें आःतक छ्यलाबुलाय् वयाच्वंगु थीथी संबत् शक, शाक्य, लिच्छवी, नेपाल संबत् निसें विक्रम संबत्यात तकं दुथ्याकादीगु दु । खय्त ला मुनकर्मिया सफू स्वयाः न्ह्यः नेपाल संबत्या बारे तःगू हे अनुसन्धानमूलक लेख व सफू पिदने धुंकूगु दु तर नेपालय् चलन चल्तीइ वःगु फुक्क संबत्या चर्चा छगू हे सफुलिइ यानातःगु आःतक पिदंगु मदुनि । उकिं थ्व सफू नेपालभाषाया नितिं जक मखु नेपाःया निंतिं हे छगू महत्वर्पूण सफू खः ।