सरासु कवि पूर्ण वैद्ययागु स्वीगुपु आधुनिक कविताया संग्रह खः । थ्व नेपालभाषाया न्हापांगु आधुनिक कविता संग्रह खः । ख्वातुगु निस्तब्धता चुंदंक तज्याये न्ह्यः चिरिक्क् संगु बाइगु सः हे सरासु खः । थ्व हे कथं शिल्पगत, विषयगत व वैचारिक रुपं न्हूगु पहया थ्व कविता संग्रहलं नेपालभाषाया काव्य ख्यलय् आधुनिक कविताया सुत्रपाट याःगुलिं, कवि पूर्ण वैद्ययात नेपालभाषाया आधुनिक कविताया प्रणेता कथं प्रतिस्थापित जुइकेब्यूगु दु । खय्तला सरासु कविता संग्रह सफूया रुपय् ने.सं १०८७ स जक पासा मुना पाखें प्रकाशित जूगु खः तर नेपालभाषाया काव्य ख्यलय् न्हूगु प्रयोग धकाः थ्व सफूया पाण्डुलिपियात ने.सं १०८४ इ हे च्वसापासां श्रेष्ठ सिरपाः देछाःगु खः । अथेहे थ्व सफूया निगूगु संस्करण कुतः प्रकाशन पाखें ने.सं ११३५ य् पिदंगु दु ।
मुक्त गद्य शैलिया प्रयोग, विम्वात्मक प्रतिकात्मक अभिव्यक्ति, मौलिक विम्व प्रतिकया छ्यला, अनुभूतिया तीब्रता तिष्णता, पुलांगु मूल्य मान्यता प्रति अनाष्ठा, वर्तमान प्रति असन्तोष, न्हूगु मूल्य मान्यता नीस्वनेगु प्रति आतुरता, भविष्यप्रति आशान्मुख, समष्टिगत भावनाया उद्बोधन हे सरासु कविता संग्रहया विशेषता खः । हार्दिकता व बौद्धिकताया समन्वय जुयाच्वंगु थ्व सरासु कविता संग्रहं लिपायापिं कविपिंत नं थज्याःगु हे लँपु ज्वनेत उत्प्रेरणा ब्यूगु दुसा नेपालभाषाया काव्यय् आधुनिक कविताया नापं प्रगतिवाद दुथ्यने धुंकूगु नं स्पष्ट जुइकेब्यूगु दु ।