नेपालभाषा एकेडेमि पाखें ने.सं ११४१ य् पिदंगु सेप्टेम्बर १७ भाजु मल्ल के सुन्दरया न्यागूगु उपन्यास खः । थ्व उपन्यासय् वय्कलं न्हापाया मेमेगु उपन्यासय् स्वयाः ब्यागलं परिवेश व भिन्न बाखंया सवा बीगु कुतः यानादीगु दु । थ्व उपन्यास परदेशय् च्वनाः थःगु पहिचान तंकाच्वनेमाःपिं अर्थात् डाइस्पोरियनतय्गु समस्यायात कयाः च्वयातःगु नेपालभाषाया न्हापांगु उपन्यास खः, नापं थ्व उपन्यासय् सुनानं थः थुकुन्हु व थ्व हे तिथिमितिइ सीगु जुल धयागु सिइकल धाःसा वयागु मानसिकताय् छु गज्यागु थलाःक्वलाः वइ धयागु न्ह्यसःया लिसः मालेगु कुतः दु । जीवन व मृत्युया दार्शनिक चिन्तनलिसें साक्षात्कार याकेगु उपन्यासकारया यत्न हे थ्व उपन्यासया मू विषयवस्तु ख । थ्व उपन्यासय् विश्व राजनीतिक रंगमंचया घटना परिघटनातय्गु चित्रण नं दु । युद्धपिपासु देय् अमेरिकाया साम्राज्यवादी नीतिया भण्डाफोड व शान्तिया पक्षय् सः तयेगु उपन्यासकारया कुतलं च्वमिया साम्राज्यवाद विरोधी, युद्ध विरोधी विश्व दृष्टिकोणयात ब्वयाब्यूगु दु । थ्व सेप्टेम्बर १७ उपन्यासया दकलय् च्वछाय्बहगु सन्देश धयागु थःगु देय् त्वःताः विदेशय् वनाः, थःगु म्हसीका तंका म्वायेगु मखु बल्कि थःपिनिगु देय् नेपालय् हे ल्याहां वयाः थःगु भाय्, कला, संस्कार, संस्कृति व म्हसीकाय् गौरव ताया म्वाये सयेकेमाः धयागु हे खः । प्रत्येक छेंखां धयाथें मांदेय् नेपाः त्वःताः विदेशय् पलायन जुइगु संस्कृति व्याप्त जुयाच्वंगु इलय् धाथें नं नेपाः मांया चिल्लायेदंगु सः कथं मल्लजुं थ्व उपन्यास च्वयादीगु दु ।