श्रीलंकाया न्या नेपालभाषाया नांदंम्ह आधुनिक बाखं च्वमि यज्ञरत्न धाख्वाःया च्वसां पिदंगु च्यागूगु बाखं संग्रह ख । नेपालभाषा एकेडेमिपाखें ने.सं ११३४ य् पिदंगु थ्व बाखं सफुलिइ– श्रीलंकाया न्या, निम्ह पासा, पानावंगु नुगः, जुक्ति, क्वथा, मिसा लाकां, च्यापसः, सुगति मन्तुना आदि यानाः झिंनिपु बाखं दुथ्यानाच्वंगु दु । थम्हं च्वयागु बाखंया च्वयेसिधःगु मिति नं तयादीम्ह ध्वाख्वाःजुं थुकी दुथ्याःगु बाखं नं ने.सं ११३२–११३४ दुने च्वःगु बाखंत खः । मूलत थुकी दुथ्याःगु बाखं सामाजिक विषयया बाखं खया नं बाखंया विषयवस्तु ब्वयेगु झ्वलय् देशकाल परिवेशया झलक नापं बाखंया पात्रया माध्यमं मानव स्वभावयात ब्वयेगु यानादीगु दु । सायद च्वमियात दकलय् यःगु बाखं जुया हे थ्व सफुलिइ दुथ्याःगु न्हापांगु बाखं श्रीलंकाया न्या नापं थ्व सफूया नां नं श्रीलंकाया न्या तयादीगु जुइमाः ।
