सुबोध नेपालभाषा व्याकरण भाजु पुष्परत्न सागरं च्वयादीगु नेपालभाषा व्याकरणया सफू खः । थ्व सफू थौंकन्हे प्रकाशन विभागया न्हापांगु पिथना कथं ने.सं १०७२ स पिदंगु खः । क्याम्पसया (नेपालभाषा विषयया) पाठ्यक्रमय् दुथ्याकातःगु थ्व सुबोध नेपालभाषा व्याकरण सफू थौंतकया दुने अर्थात् ने.सं १०७२, १०८२, १०९३ व १११५ तक यानाः प्यंगू संस्करण पिदने धुंकूगु दु । थुगु व्याकरण सफुलिइ व्याकरणया परिभाषां निसें कयाः १३२ शीर्षकया दुने व्याकरण क्वचायेकातःगु दु । थ्व व्याकरण सफू डेनमार्कयाम्ह नेपालभाषाया अध्ययता डा. हायन्स जोर्गेनशनया “A Grammar Of Classical Newari ” सन् १९३६) नांगु सफूया आधारय् च्वयातःगु व्याकरण खः, गुगु खँ च्वमि पुष्परत्न सागर स्वय्मं हे सफूया भूमिकाय् उल्लेख यानादीगु दु ।
अथेहे “A Grammar Of Classical Newari” या च्वमि हायन्स र्जोगेनसनं नं थःत नेपाःपाखें वय्कःया ज्याया बारे मन क्वसायेकाः पत्र च्वःम्ह छम्ह हे जक नेपाली पुष्परत्न सागर खः धकाः थःगु “A Grammar Of Classical Newari” सफूया भूमिकाय् उल्लेख यानादीगु दु । नेपालाभाषाय् च्वमिपिंसं थीथी सफू च्वयेगु याःसां छथी कथं च्वयेगु मजूगु, थुकिया नितिं छगू हे सूत्रय् चीगु नियम आवश्यक जूगुलिं थ्व व्याकरण च्वयागु खः धयागु खँ च्वमिं सफूया भुमिकाय् उल्लेख यानादीगु दु । नापं नेपालभाषाया व्याकरण जूगुलिं नेपाल लिपिं च्वयेमाःगु खःसां फुक्कस्यां थ्व सफू ब्वनाः व्याकरणया नियम पालन यायेमा धैगु तातुनाः हे देवनागरी लिपिं च्वयेमाःगु व देवनागरी लिपि वर्णनाप नेपाललिपि आपाः मपाःसां नेपालभाषाया भाषिक स्वरुप पाःगुलिं भाषिक स्वरुप कायम यायेकथं हे थ्व व्याकरण च्वयागु खँ नं सफूया भूमिकाय् उल्लेख जूगु दु । थ्वहे कथं, नेपालभाषा छगू ह्रस्वमय भाषा जूसां ताःहाकयेक नवायेमाःथाय् थौंकन्हे दीर्घ यानाः आखः म्हंचायेकाः च्वयेगु गुगु चलन वःगु खः अथे मयासे थ्व सुबोध नेपालभाषा व्याकरण सफुलिइ तनाच्वंगु आखः हे तयाः ह्रस्वमय यानाः च्वयेगु यानातःगु दु गथे— सः श्र सल, गाः श्र गाल, जनी श्र जनिख पसः श्र पसल आदि ।