स्वां व समय्बजि वाङमय शताब्दी पुरुष सत्यमोहन जोशीं च्वयादीगु निबन्धया मुना खः । थ्व निबन्ध मुनाया प्रकाशक पासा मुना खः । ने.सं. ११०४ य् पिदंगु थ्व निबन्ध मुनाय् न्हापा थीथी पत्रिकाय् पिहां वयेधुंकूगु जोशीया च्वखँ दुथ्याकातःगु दु । थीथी पत्रिकाया थःथःगु नियम दइगु जूगुलिं थुकी व्याकरणया रुप छगू हे मजू । नेवाः समाजय् ब्वलनाच्वंगु थःगु हे पहःयागु सांस्वृतिक मान्यतायात कयाः च्वयातःगु न्हय्पु च्वखँ थुकी दुथ्याकातःगु दु । थ्व सफुलिइ दुथ्याःगु निबन्ध मध्ये छपु निबन्ध कलखय् च्वंगु स्वां व समय्बजि निबन्धया छ्यंया लिधंसाय् थ्व सफूया नां स्वां व समय्बजि धकाः छुनातःगु खः ।