स्वनिगःया संस्कृति भाजु राजनलाल जोशीं (रास जोशीं) च्वयादीगु स्वनिगःया संस्कृति विषयया सफू खः । ने.सं. ११२९ बछलागा चतुर्थीकुन्हु कुतः पिकाकःपाखें पिदंगु थ्व सफुलिइ नेवाःतय्सं हना वयाच्वंगु जात्रा, पर्व, नखःचखःनाप स्वापू दुगु झिंस्वपु संस्कृति विषयया च्वसु दुथ्यानाच्वंगु दु । संस्कृतिया ख्यलय् नेवाःतय्गु थःगु बिस्कं पह जक मखु तसकं च्वन्ह्याःगु संस्कृति दु । तर अथे खयाः नं थौंकन्हय् नेवाः संस्कृतिइ न्हियान्हिथं मेमेपिनिगु संस्कृतिं अतिक्रमण यानाहःगु, हनावयाच्वंगु गुलिखे संस्कृतिया नं अर्थ मथुइधुंकूगु, मसिया वनेधुंकूगु दु । थथे जुल धायेवं नेवाःत, नेवाःतय्गु सभ्यता हे न्हनावनी, थथे न्हंका छ्वये मजिउ, नेवाः संस्कृति व सभ्यता ल्यंका हे तयेमाः धयागु नुगलय् तयेमाः धैगु हे थ्व सफूया मू आसय खः ।