किलागः, येँया भाजु विश्वनारायण व मय्जु कृष्णलताया काय् विजयलाल सन १९३८ स बूम्ह खः । सन् १९६२ स भारतया आग्रा विश्वविद्यालयपाखें एमबिबिएस क्वचायेका वःम्ह थ्वय्कलं सन १९६७ स वेलायतया लण्डन विश्वविद्यालयपाखें रोगविज्ञानया ख्यलय् उच्चशिक्षा ब्वनावल । नेपालय् विशेषतः एड्स थुज्वःगु घातक ल्वय्या विरुद्ध जनस्तरय् चेतना ब्वलंकेगु व उकियात क्वलायेकेत अभियान न्ह्याकेगु ज्या वय्कलं यानादिल ।
