नसंफाःगु चाया वैचारिक पक्ष नांगु सफूया च्वमि भाजु त्रिप्रसाद धौभदेल खः । ने.सं ११३९ य् भाजु ओमकारेश्वर श्रेष्ठ पाखें पिदंगु थ्व सफू नेपालभाषाया नांजाःम्ह साहित्यकार रामशेखर नकःमिया नसंफाःगु चा नांगु उपन्यासयात कयाः अध्ययन विश्लेषण यानातःगु सफू खः । थ्व सफू त्रिप्रसाद धौभदेलं १४ दँ न्ह्यः नेपालभाषाय् एम.ए. पूवंकेगु झ्वलय् रामशेखर नकःमिया नसंफाःगु चा नांगु उपन्यासयात कयाः गुगु शोधज्या यानादीगु खः व हे शोधग्रन्थयात सफूया रुपय् पिकयाः झीगु न्ह्यःने तयादीगु खः । न्यागू अध्यायय् ब्वथलातःगु थ्व सफुलिइ साहित्यया परिभाषा, उपन्यासया परिभाषा, उपन्यासया प्रकार, नेपालभाषा उपन्यासया इतिहासं लिसें नसंफाःगु चा उपन्यासया कथावस्तु, चरित्रचित्रण, भाषाशैली, वातावरण आदियात कयाः विश्लेषन यानातःगु दु ।
