नेवाः लहना किपूया लजना सफूया च्वमि भाजु प्रयागमान प्रधान खः । ने.सं. ११४० य् किपू नगरपालिकां पिथंगु थुगु सफू संस्कृति विधाया सफू खः । थुकी किपू दुने हनाच्वंगु नखःचखः, जात्रापर्वयात मू विषय दयेकातःगु दु । मुक्कं स्वब्वय् ब्वथलातःगु थुगु सफुलिइ नेवाः व नेवाः संरचना, धर्म संस्कृति संस्कार, गुथि, सम्पदाया चित्रण दु । तजिलजि दुने गथांमुगः पर्वनिसें सिथिनखःतक्क हनावयाच्वंगु पर्व न्ह्यब्वयातःगु दु । सम्पदाकथं किपूया बाघभैरब प्याखं व आगंछेँया संस्कृति दुथ्याकातःगु दु । थ्व सफूया विशेषता धैगु किपूमितय्गु जनजीवनयात संस्कृतिया माध्यमं म्हसीकाः बीगु खः ।
