ख्वपया तःमधि त्वाःया पश्चिम नासमना वनेबलय् खवय् ध्वदुइगु ल्वहंहितिया फुसय् च्वंगु बहाःया नां अखण्डशील महाविहार खः । थुगु बहाःयात अखः बहाः धकाः नं म्हसीकेफु । थ्व सक्व देय्या सुरति विहारं वःपिं बज्राचार्यतय् चूडाकर्म याइगु बहाः खः ।
अखण्डशील महाविहार जुजु नरेन्द्रदेवया शासनकालय् नीस्वंगु खः धकाः वंशावली न्ह्यथनातःगु दु । इतिहासय् न्ह्यथनातःकथं झिंनिदँ तक स्वनिगलय् वा मवयाः हाहाकार जुयाच्वंगु इलय् जलवृष्टिया निंतिं नेपालय् करुणामय बिज्याकेत ख्वपया जुजु नरेन्द्रदेव, येँया बन्धुदत्त आचार्य व यलया ललित नांया ज्यापु स्वम्ह भारतया कामारुकामाक्ष (कामाक्षा) वंगु जुल । वसपोलपिंसं लोकनाथ करुणामय दकलय् न्हापां नेपाः हयाः तयेत हे अखण्डशील महाविहार दयेकूगु खः धयागु जनविश्वास दु । यलया करुणामय रथय् बिज्याके न्ह्यः यलं थुगु बहाःया क्वाचपालयाथाय् पुजा छ्वयाहयेगु चलन दु । अथे हे करुणामय रथ साले न्ह्यः ‘अखः बहाः’ धकाः छकः धायेमाःगु नापं छुं जुयाः आश्विनकृष्ण अष्टमीया दुने करुणामय बुंगय् थ्यंके मफुसा थ्व विहारय् बुंगद्यः हयेमाः धयागु जनविश्वास ल्यना हे च्वंगु दनिगुलिं थुगु विहारया निर्माण नरेन्द्र देवया हे पालय् जूगु खः धायेफु । यद्यपि प्रामाणिक अभिलेख छुं मदु । आः तक लुयावःगु दसि प्रमाण धयागु हे विहारया गर्भगृहय् च्वंगु अभिलेख खः । थुगु अभिलेखय् ने.सं. ७७५ य् बज्राचार्य देवज्योतिं विहार जीर्णोद्धार यानाः ने.सं. ७७७ य् क्वचायेकल धकाः च्वयातःगु दु ।
अखण्डशील महाविहारया चुकदथुइ लाक तग्वःगु तेराकोटाया बज्रधातु चैत्य व नापं चिग्वःगु धर्मधातु चैत्य दु । स्वरुप हिले धुंकूगु क्वाःपाः छेँय् उत्तराभिमुख अक्षोभ्य बुद्धया क्वाःपाःद्यः दु । क्वाःपाःछेँया मूलुखा फुसया तोरण दथुइ महावैरोचन मूर्ति अंकित जुयाच्वंगु दु ।
थ्व बहाःया आयस्रोत छुं मदु । अथेसां संघ दुजःपिंसं पालंपाः नित्यपुजा याना वयाच्वंगु दु । अथे हे ल्हुतिपुन्हिकुन्हु यःमरि छायाः दथुइ च्वंगु चैत्य पुजा यायेगु चलन ल्यनाच्वंगु दनि । थुकथंया पुजा यायेत गोमधि त्वाःया रंजितकार खलःपिंसं गुथिया व्यवस्था यानातःगु दु । अथे हे गुंलागाया जुगःचःह्रेकुन्हु न्याम्ह दीपंकर पुजा यानाः पञ्चदान बीगु चलन ल्यंकातःगु दु ।
