गजल थें कब्वाली म्ये न्हापा नेपालय् नं लोकंह्वाः धैगु सी मदु । तर नेपालभाषाय् थज्याःगु म्ये नं निपु प्यपु पिदंगु खनेगु । कब्वालीकथं हालातःगु न्हापांगु म्ये खः ‘छ नं गरीब खः जि नं गरीब खः’ । थुगु म्ये दुथ्याःगु प्रगतिशील म्येमुना म्येचाः ‘क्षितिज’ ने.सं. ११०३ स पिदंगु खः । थुगु म्येया सर्जकत मध्यय् छम्ह अमरराज शर्माजुया कथं थ्व प्रगतिशील कब्वाली म्ये खः । अनंलि यःत्यः मतिनाया खँपुत दुथ्याःगु कब्वालीकथं हालातःगु न्हापांगु म्ये दुथ्याःगु म्येचाः ‘लाय्लामा’ ने.सं. ११०८ स पिदंगु खः । थुकी दुथ्याःगु कब्वाली म्ये हालादीपिं खः जुजुकाजि रंजित, ज्ञानु राणा व नगिना जोशी । विष्णु जल्मिं च्वयादीगु थुगु म्येय् लसय् हनादीम्ह कृष्णमान डंगोल खः । म्येया बोल थुकथं दु– हाकुमैंचा वये धाल, तुयू मैंचा वये धाल, जिमि मां नं मयः धाल तंचाये मते न्हां मय्जु ।
