येँया क्वःने लागाया जोशी देगलं (जैसीदेगः) ह्यूमत वनेगु झ्वलय् ३५० मिटर क्वय् जवपाखे कुसांबहाः दु । थ्व बहाः क्वसांबहाःया कचा बहाः खः । थ्व बहालय् पूर्वाभिमुख बैरोचन बुद्ध पलिस्था यानातःगु दु । द्यःया क्वसं तयातःगु शिलापत्रय् ने.सं. ८६५ य् संघया शाक्यभिक्षु चक्रपतिदेवं तःगु न्ह्यथनातल । थ्व क्वाःपाःद्यया मू लुखा फुसय् तोरं तयातःगु मदुसा च्वय्या ब्व मनू च्वनेगुकथं छ्यलाबुला याना वयाच्वंगु दु । क्वाःपाःद्यया न्ह्यःनेसं निम्ह ल्वहंया सिंह दु ।
न्ह्यःने चिभाःद्यः व जवपाखे मन्दःपाः तयाः तल । थ्व बहाःया संघसदस्यत लगभग थ्व थासं पिने हे पिहां वंगु अवस्था दु ।
