असं त्वाःया सिथय्लाक थ्व बहाः दु । तक्षेबहाःया कचा बहाःकथं खवय्लाक लाःगु चुकयात क्वथुबहाः धाइ । अशोकवृक्षया नामं असं नामाकरण जूगु व व हे नांम्ह अशोकवृक्ष विहार धकाः थ्व बहाःया नामकरण याःगु खनेदु । विहारया छुं नं अवशेष थन मदु । तर पश्चिमाभिमुख जुयाच्वंम्ह ह्याउँख्वाम्ह अमिताभ बुद्ध थ्व विहारया क्वापाःद्यः खः । थन पुजा यायेत गं, बज्र, च्वाम्व दक्व तयातःगु खनेदु । थौंकन्हय् थ्व बहाःया क्वाःपाःद्यःया क्वथा दुने पसःया गोदाम दयेकातःगु दु ।
झिंखुगूगु शताब्दीपाखे थ्व बहाः दयेकूगु अनुमान दु । वि.सं. १९९० सालया भुखाय् धुंकाः थ्व द्यःछेँ दयेकूगु खः । न्हापा थनया पुजाआजा तक्षेबहाःया गुर्जुपिंसं याना वयाच्वंसां आयस्ता मदयाः लिपा दिनावंगु खनेदु ।
