ख्वपया क्वाठण्डौं त्वाःया पश्चिम, प्रसन्नशील महाविहारया दक्षिण अले विकु बहाःया उत्तर व मञ्जुवर्ण महाविहार व विश्व बहाःया पूर्व दिशाय् ल्वहंतं सियातःगु चकंगु विहार हे प्रसन्नशील महाविहार खः । प्रसन्नशील महाविहारया मेगु नां पशुपति विहार खः । थुगु विहारयात पशु बहाः नं धायेगु याना वयाच्वंगु दु । प्रसन्नशील महाविहार दीपंकर महाविहारया वज्राचार्य, क्वाठण्डौ, बेखाः व आदीपद्म (त्वं बहाः)या शाक्यपिनि चुडाकर्म याइगु ख्वप देय्या छगू जक मंकाः बहाः खः । थुगु बहाःया संघ परिवार थ्य.मथ्यं द्वःछि दु । मेमेगु विहारय् स्वयाः थ्व दकलय् अप्वः खः ।
थुगु विहारय् वज्राचार्य कजि जुयाः चुडाकर्म जुल धाःसा शाक्यपिं नापं च्वनाः चुडाकर्म यायेमज्यू । तर शाक्य कजि जुयाः चुडाकर्म जुइबलय् वज्राचार्यपिंसं चुडाकर्म याइमखु । वज्राचार्य कजि जुयाः चुडाकर्म जुइबलय् दीपंकर विहारया दीपंकरया प्रतिमूर्ति न्ह्यःने तयेमाःगु चलन दु ।
प्रसन्नशील महाविहारया दक्षिण दिशाय् उत्तराभिमुख क्वाःपाःद्यः दु । थनया क्वाःपाःद्यः पद्मपाणी लोकेश्वर खः । क्वाःपाः द्यःया न्ह्यःने छत्रपाल, वज्रधातु, चैत्य, ज्वाला न्हाय्कं व छगः गं दु । पश्मिपाखे चुडाकर्म यायेत दयेकातःगु यज्ञ मण्डल दु । अथेहे चुडाकर्मया इलय् न्याम्ह पँय्ताःखलःपिंसं कलशाभिशेष पश्चिम सीमा गृहया रुप् स्वंगू मण्डल दयेकातःगु दु । अथेहे विहारया पूर्व व पश्चिम दिशाय् शाक्य व वज्राचार्यपिनि अलग अलग आगंद्यः दु ।
प्रसन्नशील विहारया निर्माण तिथिमिति क्वःजिक धायेमफुसां विहारया उत्तर प्रांगणय् च्वंगु संवत् ९९२ स पलिस्था जूगु चैत्यया शिलापत्रय् प्रसन्नशील विहार धकाः उल्लेख जूसां अप्वः धयाथें अभिलेखय् पशुपति विहार धकाः उल्लेख जूगु दु ।
सुकुध्वाखा बहाःया ताडपत्र पञ्चरक्ष सफुलिइ जुजु जयज्योति देव मल्ल (शासन संवत् ५३०–५४०) नां सहित श्री पशुपति विहार धकाः उल्लेख जुयाच्वंगुलिं उगु ईया न्ह्यःहे पशुपति विहार दयेधुंकूगु पुष्टि यायेफु ।
अथेहे ने.सं. ६६८ या छगू तमसुक पत्रय् श्री भाष्करदेव संस्कारित श्री हिरण्यवर्ण महाविहारया दानपति धर्मात्मा कसराज भारो नं ‘दिशादि संघ महाभोज्य’या ग्वसालय् ब्वना पौ कथं ख्वप देय्या श्री मत श्री श्री क्वाचपाल भट्टाकरया समीप च्वंगु श्री भुवनाकर धर्म संस्काृरित पशुपति विहार संघ व श्री ३ दीपंकर भट्टारक सहितयात ब्युगु ब्वनापौ, अथेहे संवत् ६९४ जेष्ठ कृष्ण पक्षया दिनस राजगत लोकधर्म संस्कारित श्री पद्मकाष्टगिरिसं गुं विहारया दानपति धर्मात्मा कीर्तिराज क्वाथ नायक भारो नं ‘दिशादि संघ सहभोज्यया आयोजनाय् श्री भुवनाकरध र्म संस्कारित श्री धर्मकीर्ति महाविहार पशुपति विहार व श्रीमत दीपंकर भट्टारक सहित सकलयात ब्युगु ब्वनापौया आधारय् पशुपति विहारया निर्माण श्री भुवनाकर पालाय् जूगु खः धयागु प्रमाणित जुल ।
स्थापनाया इलय् निष्र्यया गुलांधर्म हनेगु मोहनीया इलय् कुमारीद्यःयात यायेमाःगु पूजाकर्मया नापं नित्य पुजाया ज्या थौंतक नित्य जुया वयाच्वंगु दु ।
