याक्वय् काकाः उकिइ दुगु सुका थें चीपुगु तार ल्हातं सालाः मेगु ल्हाःया पतिंचां थाइगु थ्व बाजंयात याक्वमुको, याकुपिंचा व याकुचा बभू नं धाइ । नेवाःतय् थीथी जात्रा पर्व व प्याखनय् थ्व बाजं थाइगु चलन दु । थ्व बाजं थ्यंमथ्यं १८ सेमि हाकः व १४ सेमि ब्या दुगु छिपय् यानातःगु भ्वकाचा दथु फुस्लुं यानाः बाय् पंत्वाःया छखेया गौ ध्यनाः मेखे च्वलय्चिया छ्यंगुलिं भुनाः सुका थें चीपुगु तार छ्यंगूया दथुइ ह्वतं दुछ्वयाः सिंकाय् थाकाः दयेकीगु खः । थौंकन्हय् थ्व बाजं उलि छ्यलाबुलाय् मदु ।
