यल दौबहाःया पश्चिम कुलामय् योकुबहाः (योकुलि महाविहार) दु । थन बहाःया नामय् चुकया दथुइ चैत्य छगः जक दु । अनसं देगःचा दयेकाः थुकिइ मूद्यःकथं अक्षोभ्य तथागत स्थापना यानातःगु दु । देगःया च्वय् गजूया थासय् तयातःगु चैत्ययात नागं कुइकातःगु दु । अथे हे थन धर्मधातु छगः व गणेश व महांकालया मूर्ति नं दु ।
थन बहाःया निर्माणकालया उल्लेख जूगु ऐतिहासिकता ब्वइकथंया अभिलेख छुं मदु । अथेसां थन बहाःया जवय् अंगलय् ने.सं. ७३१या शिलापत्र दुगु ल्याखं थ्व बहाःया इतिहास नं उकथं हे पुलां धायेछिं । थन या पञ्चस्थविर आजुपिं व संघ जानाः थीथी धार्मिक क्रियाकलाप न्ह्याकावयाच्वंगु दु ।
