मय्जु डा. उरलिके क्वयलभर नेपालभाषायात कयाः विद्यावारिधि उपाधि काःम्ह न्हापांम्ह मिसा खः । नेपाल–जर्मन सरकारया दथुइ हस्तलिपि संरक्षण परियोजनाया छम्ह विज्ञ कथं मय्जु उरलिके सन १९७१ य् दकलय् न्हापां नेपाः थ्यंगु खः । दछि तक नेपाः च्वनादीबलय् वय्कलं नेवाः भाय् सयेकेगु ह्वताः चूलाकादिल । थःगु देय् जर्मन लिथ्यंकाः सन १९७५ य् कोलोन विश्वविद्यालयपाखें चूलाःगु शोधवृतिं नेवाः भाय्या क्रिया खँग्वःया वर्ण विन्यास विषयय् विद्यावारिधि उपाधि कायेत ताःलाकादिल। थ्व इलय् तक नेवाः भाय्या आदिभूमि नेपाः देय्दुने थुकथं शोध अध्ययन यायेगु व उच्च शिक्षाया गुगुं सुविधा मदुनि ।
मय्जु उरलिकेपाखें पूवंकूगु थुकथंया प्राज्ञिक स्तरया कुतःयात च्वछासें नेपालभाषाया दकलय् पुलांगु साहित्यिक संस्था च्वसापासां वय्क:यात भाषाजवाः पदवीं हनेगु ज्या जूगु खः। लिपा भाजु ईश्वरानन्द श्रेष्ठाचार्यनाप जानाः नेवाः समुदायया दथुइ थौंया इलय् छ्यलाबुलाय् वयाच्वंगु नेवाः खँग्वःत मुंकाः ‘A Dictionary of Contemporary Newari’ सफू पिकयादिल ।
त्रिभुवन विश्वविद्यालय अन्तर्गत सन् १९७१ निसें न्ह्यानाच्वंगु समर इन्स्टिच्यूट अफ लिंगुइस्टिक नांयागु अमेरिकी अध्ययन संस्थाया दुजः जुयाः नं मय्जु उरलिकें नेपाःया थीथी थासय् वनाः भाषा विज्ञानबारे अध्ययन अनुसन्धान ज्या यात । अथेहे नेवाःया नापनापं मेमेगु भाय्या सम्बन्धय् नं तःगू अध्ययन अनुसन्धान यायेगु व शोधपूर्ण च्वसु च्वयेगु ज्या यानादिल ।
