नेपालभाषाया थीथी पत्रपत्रिकाय् च्वखँ पिथनाः निबन्धकार कथं थःत म्हसीकावःम्ह डा. बाल गोपाल श्रेष्ठया गुलिं पिहांवये धुंकूगु व गुलिं न्हूगु निबन्ध छथाय् मुंका हलिमलि (११०५) सफूकथं पिदंगु खः । भावना पिथना, यें पाखें ने.सं ११०५ य् पिदंगु थ्व सफुलिइ दुथ्याःगु दक्व निबन्धयात उत्कृष्ट धकाः धायेथाय् मदुसां फुक्कंया प्रेरक सिद्धान्त जनपक्षीय जूगु दु । अथेहे युक्तपूर्ण सोचाइ, अन्धविश्वासं मुक्त बिचालं जक समाजयात न्ह्यज्याके फइ धयागु बिचाः थ्व संग्रहय् वानाच्वंगु दु । वैचारिक स्पष्टता, वस्तुयात दुथ्यंक वालेगु तेल्लाःमिखा, तिक्क मिंक कुलाबीफुगु हार्दिकता थ्व निबन्ध सफूया मेगु विशेषता खः ।
