रामशरण महर्जनया जीवनया ब्वनासाइ हाइकु सफू ने.सं. ११३७ य् हलिं नेवाः गुथि गःछेँ कचापाखें पिदंगु खः । थुकी मुक्कं ५३१ पु हाइकु दुथ्याकातःगु दु । सफू दुने समाजय् जुयाच्वंगु वा थःम्हं खनाच्वंगु, भोगे यानाच्वंगु स्थिति, नेतातय्गु घच्चाइपुसेच्वंगु नीति, उमिगु हुनिं जनतां फयेमालाच्वंगु दुःख प्वंकातःगु दु । जब सुं प्रति विश्वास मदइ, ला व लुसि थें मिलय् जूपिं नं बाया वनीगु अवस्था लिसें जीवन प्रति घाट–प्रतिघाटया बाखंत, संस्कृति, परम्परा प्रति व्यञ्जनापूर्ण अभिव्यक्ति प्वंकातःगु दु ।
