नेपालभाषा हाइकुया जातः सफूया च्वमि भाजु कृष्णभक्त बोडे खः । थ्व सफू कुतः पिकाकःया लुखां ने.सं. ११३५ य् पिदंगु खः । थ्व सफू खोज मूलक, जानकारी मूलक छगू दस्तावेज खः । हाइकु छु खः ? थ्व गथे जुइमाः धयागु लिसें नेपालभाषाया हाइकु च्वमितय् परिचय, प्रकाशित हाइकु सफूया विवरण व परिचय नापनापं हाइकु च्वमिपिनि प्रतिनिधि हाइकु नं थ्व सफुलिइ दुथ्यानाच्वंगु दु । नेपालभाषा साहित्यय् हाइकु विधायात विकास यायेया निंतिं जुयाच्वंगु गतिविधि नं थुकी दु ।
