स्वनिगः पिनें पिदंपिं नेपालभाषाया भाषिक अभियन्तापिं मध्ये भाजु सानुकाजी शाक्य नं छम्ह खः । वय्कःया जन्म बि.सं.१९८३ जेष्ठ ९ गते ख्वपय् जूगु खः । लिपा वय्कः लजगाया ल्याखं धरानय् झाल । वय्कःया मांया नां धनमाया व बाःया नां मानकाजी शाक्य खः । धरानय् ज्यासः ज्या न्ह्याकादीम्ह वय्कलं २०१६ सालय् कालिगढी सहकारी समितिया नायः जुयादिल । वय्कलं भारतया थीथी थासं सिजः, ली हयाः धरानया कालिगढीतय्त थीथी थलबल दयेकेगु ज्या बियादिल । झीगु समाज धरानया ३७ दँ तक संस्थापक नायः जुयाः नेवाःतय् निंतिं यक्व ज्या यानादीम्ह वय्कः वि.सं. २०६४ फागुनय् दिवंगत जूगु खः ।
