सत्यमोहन जोशीया जीवनी सफूया च्वमि भाजु मदन सेन वज्राचार्य खः । थ्व सफूया पिकाकः सत्यमोहन जोशी हनेज्या ग्वसाः खलकं हनेज्याया लसताय् ने.सं. १११४ य् पिकाःगु खः । थीथी प्रतिभां जाःम्ह भाजु जोशीं नेपालभाषा व थ्वया साहित्य, संस्कृति, कला सुथांलाक्क न्ह्याकेगु निंतिं अनवरत रुपं याना च्वनादीगु सेवा व योगदानयात कयाः भाजु जोशी न्हय्न्यादँ क्यंगु बुन्हिया लसताय् नेपालभाषा साहित्य ख्यलं वय्कःयात तःजिक हनेज्या याःगु खः । थथे वय्कःयात जीवित अवस्थाय् हे हनेकथं पिदंगु थ्व सफुलिइ झिंनिद्या दु । थ्व झिंनिद्याया दुने सत्यमोहन जोशीया बुसांनिसें न्हय्न्यादँ क्यंगु ईतकयागु जीवनी वृतान्त दुथ्याकातःगु दु । सत्यमोहन जोशीया प्याखं सत्यमोहन जोशीया प्याखं सफूया सम्पादन व मुंम्ह बिमल ताम्राकार खः । ने.सं. १११४ दिल्लाथ्व गुरुपुन्हिकुन्हु कुतः पिकाकःपाखें पिदंगु खः ।
