सिद्धिचरणया निबन्ध सफूया नामं हे सीदु थ्व युगकवि सिद्धिचरण श्रेष्ठया निबन्ध संग्रह खः । फल्चा पिथनापाखें ने.सं. १११२ ल्हुतिपुन्हिकुन्हु पिदंगु थ्व सफू भाजु फणीन्द्ररत्न वज्राचार्यं सिद्धिचरणया थुखेंउखें लानाच्वंगु निबन्धयात छथासं मुनेगुया नापं सम्पादन यानाः सिद्धिचरणया निबन्ध नामं पिकयादीगु खः । कवि कथं जक अप्वःस्यां म्हस्यूम्ह सिद्धिचरणयात थ्व सफुलिं गद्य विधाय् नं वय्कःया ल्हाः उलि हे च्वः धैगु क्यनाब्यूगु दु । थुकी दुथ्याःगु निबन्धयात सिद्धिचरणं थःगु जीवनकालया परिस्थिति व अवस्थायागु अभिलेख धयादीगु दु ।
