यमि गामाः यँ शहर नांगु सफू ने.सं. १११२ य् पलेस्वां पिथना पाखें पिदंगु महाकवि गिरिजाप्रसाद जोशीं च्वयादीगु उपन्यास खः । गुद्या दुगु थ्व उपन्यास शिक्षा व इहिपाया दुवातय् लाःम्ह नारी पात्र व क्रान्तिया मि च्यानाच्वंगु गामय् ब्वलंम्ह छम्ह युवाया जीवनय् केन्द्रित उपन्यास खः ।
थ्व उपन्यासय् मतिना व राजनीति दथुइया द्वन्द्व अर्थात मतिनायात ल्ययेगु वा थःत जनताया निंतिं राजनीतिइ फ्यायेगु धैगु दथुइया द्वन्द्व न्ह्यब्वयातःगु दु । इलय् इहिपा मजूम्ह छम्ह बुरीकन्यां न्हाय्कं स्वइबलय् न्हाय्कनं थःत हिस्याःगु थें च्वनीगु स्वाभाविक खः । इहिपा जीवनया आवश्यकता खः तर शिक्षायात मू बीपिंसं शिक्षायात गबलें सराः तायेकीमखु । बरु शिक्षा हे थःगु जीवनया आधार तायेकी धैगु हे थ्व उपन्यासया सार जूगु दुसा मतिनायात क्रान्तिं थी मखु, मतिनाया ख्यलय् जुइगु शोषण व अन्याःयात न्हंकेगु छुं हे व्रान्ति मदु धैगु उपन्यासकार गिरिजाया धापू नं मनन् यायेबहःजू ।
