नेपालभाषाया नापं नेपाली भाषां च्वसा न्ह्याकादीम्ह वासुशशीया वास्तविक नां वासुदेव वैद्य खः । थ्वय्कःया जन्म ने.सं १०५८ य् येँया ग्वलय् जूगु खः । कविताया नापं प्याखं विधाय् थःगु च्वसा न्ह्याकादीम्ह खयाः नं थ्वय्कःयात नेपालभाषाया ख्यलय् प्याखं च्वमि कथं अप्वः म्हसीकेगु याः । थ्वय्कया ताःचा प्वाँय् (ने.सं १०८९) व झुमिं यंम्ह मनू (ने.सं ११०६) यानाः निगू पूधाः प्याखं पिदंगु दु । थुपिं प्याखं यक्व न्ह्यः हे दबुली मञ्चन जुइधुंकूगु खः । प्याखं तसकं लोकंह्वासेंलि लिपा तिनि सफूया रुपय् पिकाःगु खः । नेपालभाषाय् न्हापां समस्यामूलक प्याखं च्वयादीपिं च्वमिपिं मध्ये थ्वय्कः नं छम्ह खः । छगू परिवारया समस्या पाखें समाजया हे समस्या ब्वयेगु थ्वय्कःया नाटकया विशेषता खःसा समसामयिक विषयय् सजीव पात्र चित्रण थ्वय्कःया नाटकया मेगु विशेषता जूगु दु ।
