ती स्वयेगु : काष्ठ कलाया दयेकागु सामान त्रिपट जू मजू स्वयेत छ्यलीगु खँग्वः ।
इकुं मिले यायेगु : दयेकागु सामानया कुं पाय्छि जू मजू स्वयेगु । इकुं मिले जू मजू स्वयेत बतां छ्यलीगु खः ।
ह्वनेगु : निगू व व स्वयां अप्वः सिँया ब्वति (भाग) स्वायेगु ।
खोंच फायेगु : थीथी प्रकारया बुसुका (छगू कथंया रन्धा) छ्यलाः झरि म्हुइगु ।
छायेगु : रन्धा वा बसिलां सिँ माथं वंकेगु ।
नी ल्हायेगु : थीथी ब्व ह्वनेबलय् न्हापांगु कंया बतां मिले जू मजू स्वयेगु ।
तुपि तयेगु : धलिमय् चुकू तायेगु ।
न्वकेगु : थीथी भाग ह्वनेबलय् मिले यायेत न्वकेगु ।
त्वाः ल्हायेगु : थीथी भाग ह्वनेबलय् अप्वः भाग त्वाः ल्हायेगु ।
पतला कायेगु : ह्वनेगु, निगुलिं सिँया सिथय् वा दथुइ फ्वः (मोटाइ)या बछि बछि ब्व हंचां लिकनाः निगुलिं सिँ ह्वनेगु ।
साः ल्हुइगु : जोर्नीया चुकू (tenon) दयेकेगु ज्या । थ्व दयेकेबलय् हं व मुगः प्रयोग जुइ ।
प्वाः खनेगु : जोर्नीया चुकू (tenon) या नाप कथं प्वाः खनेगु हं व मुगः छ्यलाः प्वाः खनी ।
फाः चीगु : कुचा ह्वने धुंकाः रन्धां चौडाइया ब्व (surface) मिले यायेगु ।
फि चीगु : सिँ कुचा ह्वनेधुंकाः रन्धा छ्यलाः फि मिले यायेगु ।
फे च्याकेगु : फुक्कं भाग ह्वनेधुंकाः मेच, टेबुल, चौकोस आदि सिथय्या कुं ग्वःलाकेगु ।
स्वथनेगु : जोर्नी पाय्छि जुइवं ह्वनेगु ।