भाजु रमेशमान पियाया बूगुदिं ने.सं.१०८१ तछलागा १ खः । वय्कःया मांया नां बिष्णु देवी पिया व अबुया नां मानकाजी पिया खः । भाजु रमेशमान पिया नेपालभाषा मंकाः खलः, येँ नीस्वंसां निसें थौंतक प्रत्यक्ष व परोक्षकथं आवद्ध जुयाः नेवाःतय् हकहितया संघर्षय् निरन्तर कृयाशिल जुयाच्वनादीम्ह व्यक्ति खः । वय्कः मंकाः खलकय् आबद्ध जुयाः भाषिक, सांस्कृतिक संघर्षया थीथी ज्याझ्वलय् महत्वपूर्ण भूमिका म्हितादीम्ह व्यक्ति खःसां वय्कः नेतृत्वया पंक्ति च्वनामदी । अथेखःसां निरंकुश पंचायत सरकारया पालय् आन्दोलनया क्रमय् छक्वः वय्कः खुला ति जेलय् लात । थुकिं भाषिक आन्दोलनय् वय्कःयात उर्जा हे जक तनाबिल ।
नेवाः संस्कृतिया बिषय अध्ययन अनुसन्धानय् नं वय्कः सक्रिय जुयादी । वय्कः नेवाःतय् नखःचखः, संस्कृति दुने दयाच्वंगु दर्शनयात बांलाक्क थूम्ह व्यक्ति खः । ने.सं.११२२ दँय् अर्थ प्रकाशनया लुखां पिदंगु ‘झीगु संस्कृति’ नांगु सफुतिइ थीथी शिर्षकय् नेवाः सामाजिक व सांस्कृतिक विषयया च्वसु च्वयादीगु दु । भाजु रमेशमान पिया लेखा परिक्षणया ज्या यानादी । वय्कलं आपालं नेवाः संस्थातय्गु लेखापरिक्षण व लेखा सम्वन्धी सल्लाहसाहुति बियाः ग्वाहालि नं यानादीगु दु ।
